कोपरगाव नगरपरिषदेच्या वतीने आधार अपडेट सेंटर लवकर सुरू होणार : नगराध्यक्ष पराग संधान

कोपरगाव शहरातील नागरिकांना आधार कार्ड संबंधित कामांसाठी होणारी गैरसोय लक्षात घेऊन कोपरगाव नगरपरिषदेच्या वतीने लवकरच आधार अपडेट सेंटर सुरू करण्यात येणार असल्याची माहिती नगराध्यक्ष पराग संधान यांनी दिली आहे. या निर्णयामुळे शहरातील नागरिकांना आधार कार्डमधील विविध बदल व अद्ययावत करण्याची सुविधा स्थानिक पातळीवर उपलब्ध होणार आहे.नागरिकांच्या मागणी आणि तक्रारी येत होत्या त्यावर निर्णय घेत पालिकेने कार्यवाही केली आहे.

सध्या आधार कार्डमध्ये नाव, पत्ता, जन्मतारीख, मोबाईल क्रमांक किंवा बायोमेट्रिक अद्ययावत करण्यासाठी नागरिकांना दूरच्या केंद्रांवर जावे लागते. त्यामुळे नागरिकांचा वेळ आणि खर्च दोन्ही वाढत होता ही अडचण लक्षात घेऊन नगरपरिषदेने पुढाकार घेत आधार अपडेट सेंटर सुरू करण्याचा निर्णय घेतला आहे.

नगराध्यक्ष पराग संधान यांनी सांगितले की, नगरपरिषदेच्या इमारतीत हे केंद्र सुरू करण्यासाठी आवश्यक प्रक्रिया पूर्ण केली आहे. संबंधित विभागाशी समन्वय साधून तांत्रिक बाबी पूर्ण केल्या आहेत. लवकरच हे केंद्र नागरिकांच्या सेवेत उपलब्ध होईल.या केंद्राच्या माध्यमातून आधार कार्ड अपडेट, बायोमेट्रिक नोंदणी, मोबाईल नंबर लिंक करणे, पत्त्यात बदल करणे आदी सेवा नागरिकांना एका ठिकाणी मिळणार आहेत. त्यामुळे शहरातील नागरिकांना मोठा दिलासा मिळणार असून सरकारी योजनांचा लाभ घेण्यासाठीही आधार अपडेट करणे सुलभ होणार आहे.नगराध्यक्ष पराग संधान यांनी नागरिकांना आवाहन केले की, केंद्र सुरू झाल्यानंतर ज्यांचे आधार कार्ड अद्ययावत करायचे आहे त्यांनी या सुविधेचा लाभ घ्यावा. नगरपरिषद नागरिकांना अधिकाधिक सोयीसुविधा उपलब्ध करून देण्यासाठी सातत्याने प्रयत्नशील असल्याचेही त्यांनी यावेळी सांगितले.