कोपरगाव नगरपरिषद नवीन प्रशासकीय इमारतीसाठी अग्निशमन संयंत्र प्रणालीचे निधीस जिल्हाधिकाऱ्यांचा सकारात्मक प्रतिसाद

कोपरगाव नगरपरिषदेसाठी मा. आ.स्नेहलताताई कोल्हे यांच्या विशेष प्रयत्नातून उभारण्यात आलेल्या नवीन प्रशासकीय इमारतीचे बांधकाम चार वर्षांपूर्वी पूर्ण झाले असून,फर्निचर काम सुरू आहे.लवकरच या इमारतीत स्थलांतर करण्याचा नगरपरिषदेचा मानस आहे. मात्र, प्रशासकीय इमारतीत स्थलांतरासाठी आवश्यक असलेले अग्निशमन संयंत्र प्रणालीचे काम पूर्ण होणे अत्यावश्यक आहे. यासाठी सुवर्णजयंती नगरोत्थान योजनेअंतर्गत निधी उपलब्ध करून देण्याची मागणी जिल्हाधिकारी पंकज आशिया यांच्याकडे करण्यात आली.

जिल्हाधिकारी पंकज आशिया कोपरगाव दौऱ्यावर आले असता नगराध्यक्ष पराग संधान,गटनेते प्रसाद आढाव, माजी उपनगराध्यक्ष विजय वाजे, नगरसेवक संतोष शिंदे यांनी त्यांची प्रत्यक्ष भेट घेऊन ही मागणी सविस्तरपणे मांडली. या मागणीस जिल्हाधिकाऱ्यांनी सकारात्मक प्रतिसाद दिल्याने नगरपरिषदेच्या प्रशासकीय कामकाजाला गती मिळणार असल्याचा विश्वास व्यक्त करण्यात आला.

युवानेते विवेकभैय्या कोल्हे यांनी देखील जिल्हाधिकारी पंकज आशिया यांच्याशी फोनद्वारे संपर्क साधून कोपरगाव शहराशी संबंधित विविध महत्त्वाच्या प्रश्नांवर चर्चा केली. शहराच्या सर्वांगीण विकासाच्या दृष्टीने आवश्यक असलेल्या बाबी त्यांच्याकडून मांडण्यात आल्या.यावेळी शासकीय कार्यालये व इमारतींकडून थकीत असलेला मालमत्ता कर नगरपरिषदेला मिळावा, जेणेकरून त्या निधीतून शहरातील विकासकामे अधिक प्रभावीपणे राबवता येतील, अशी ठाम भूमिका उपस्थित मान्यवरांनी मांडली.प्राधान्याने तहसील कार्यालयाकडे असणारी रक्कम पालिकेला मिळावी तसेच पर्यावरणपूरक आणि दीर्घकालीन बचतीच्या दृष्टीने कोपरगाव शहरातील सर्व पथदिवे सौर ऊर्जेवर आधारित करण्याची मागणीही करण्यात आली.जिल्हाधिकाऱ्यांनी या सर्व मागण्यांची दखल घेत सकारात्मक भूमिका दर्शविल्याने कोपरगाव शहराच्या विकासाला नवसंजीवनी मिळणार असल्याची भावना यावेळी व्यक्त करण्यात आली.