कोपरगाव शहरातील पार्किंग अतिक्रमणे हटवून जागा मोकळ्या करण्याची मागणी
कोपरगाव शहरातील पार्किंग अतिक्रमणे हटवून जागा मोकळ्या करण्याची मागणी
कोपरगाव शहरातील नगरपरिषद अंतर्गत असलेल्या व्यापारी संकुल व खाजगी कॉम्प्लेक्स परिसरातील पार्किंग जागांवर मोठ्या प्रमाणावर अतिक्रमणे झाल्याचे आढळून येत असून, ती तात्काळ हटवून पार्किंग जागा मोकळ्या करण्यात याव्यात, अशी मागणी माझा गाव माझा अभियान – कोपरगावकर यांच्या वतीने करण्यात आली आहे.
कोपरगाव शहरातील नगरपालिका अंतर्गत असलेल्या व्यापारी संकुलांमध्ये तसेच खाजगी कॉम्प्लेक्समध्ये परवानगी दिलेल्या पार्किंग जागांवर बहुदा बांधकाम स्वरूपातील अतिक्रमणे करण्यात आली आहेत. अनेक ठिकाणी पार्किंगसाठी राखीव असलेल्या जागांवर दुकाने किंवा अन्य स्वरूपाची बांधकामे उभारण्यात आल्याने वाहनधारकांना पार्किंगची सुविधा उपलब्ध होत नाही. परिणामी शहरातील रहदारी व वाहतुकीच्या समस्या दिवसेंदिवस गंभीर होत चालल्या आहेत.पार्किंगच्या जागा व्यापल्या गेल्यामुळे मुख्य रस्त्यांवर वाहनांची गर्दी वाढत असून, त्यामुळे अपघातांचा धोका तसेच वाहतूक कोंडीची समस्या वारंवार निर्माण होत आहे. यामुळे नागरिकांना मोठ्या त्रासाला सामोरे जावे लागत आहे. म्हणून प्रथमतः सर्व व्यापारी संकुल व कॉम्प्लेक्समधील परवानगीप्राप्त पार्किंग जागा मोकळ्या करून त्या खुल्या करण्यात याव्यात, अशी ठाम मागणी करण्यात आली आहे.
या संदर्भात माझा गाव माझा अभियान – कोपरगावकर यांच्या वतीने विनय भगत, विजय जाधव, मयूर आव्हाड व अमित आढाव यांनी ४ फेब्रुवारी २०२६ रोजी जिल्हाधिकारी यांना निवेदन सादर केले आहे. नगरपरिषद प्रशासनाने याबाबत तातडीने कारवाई करून शहरातील वाहतूक व्यवस्था सुरळीत करावी, अशी अपेक्षा नागरिकांकडून व्यक्त करण्यात येत आहे.
