गौतम पब्लिक स्कूल मध्ये ५७ महाराष्ट्र बटालियन ट्रेनिंग कॅम्प

गौतम पब्लिक स्कूल मध्ये ५७ महाराष्ट्र बटालियन ट्रेनिंग कॅम्प

कोपरगाव वार्ताहर–कोपरगाव तालुक्यातील कर्मवीर शंकरराव काळे एज्युकेशन सोसायटी संचालित गौतम पब्लिक स्कूलमध्ये केंद्र व राज्य सरकार यांच्या संयुक्त विद्यमाने सीएटीसी २०७/५७  महाराष्ट्र बटालियन एनसीसी वार्षिक ट्रेनिंग कॅम्प पार पडत आहे. या ट्रेनिंग कॅम्पमधील विद्यार्थ्यांसाठी संस्थेचे विश्वस्त आमदार आशुतोष काळे व सचिव सौ. चैतालीताई काळे यांच्या सूचनेनुसार सर्व प्रकारच्या सोयी सुविधा उपलब्ध करून देण्यात आल्या असल्याची माहिती प्राचार्य नूर शेख यांनी दिली आहे.

सोमवार (दि.११) पासून हा ट्रेनिंग कॅम्प सुरु झाला असून बुधवार (२०) रोजी या कॅम्पची सांगता होणार आहे.अहिल्यानगर जिल्ह्यातील २८ शाळांतील इयत्ता ८ वी व ९ वी आणि १५ महाविद्यालयातील इयत्ता ११ वी व १२ वी आणि वरिष्ठ महाविद्यालयाच्या एनसीसीच्या एकूण ४०२ विद्यार्थी या वार्षिक ट्रेनिंग कॅम्प मध्ये प्रशिक्षण घेत आहेत. यामध्ये २६२ मुले आणि १४० मुलींचा समावेश असून गौतम पब्लिक स्कूलच्या २१ विद्यार्थ्यांचा समावेश आहे. या विद्यार्थ्यांना कॅम्प कमांडर कर्नल आशिष रैना, डेप्युटी कॅम्प कमांडर कॅप्टन अंकुश आवारे, कॅम्प सुभेदार मेजर राजेंद्र सिंग यांच्या मार्गदर्शनाखाली त्यांची टीम सहभागी विद्यार्थ्यांना प्रशिक्षण देत आहेत.

 या ट्रेनिंग कॅम्पमध्ये विद्यार्थ्यांना व्यायाम, परेड, रायफल चालविणे प्रशिक्षण, नकाशा वाचन, जर्निंग डीस्टंन्स,  फिल्ड ग्राम, हेल्थ आणि आयजीन या विषयांचे प्रशिक्षण दिले जात आहे. तसेच सेंन्ट्रल लेक्चरमध्ये आगीपासून बचाव करणे, वन विभागाच्या माध्यमातून जंगलातील प्राण्यांची ओळख आणि प्राण्यांच्या हल्ल्यातील प्राथमिक उपचार प्रशिक्षण, परिवहन विभागाकडून आपत्कालीन वाहतूक नियम आणि वाहन चालवण्याचे प्रशिक्षण दिले जात आहे. देशात व राज्यात अचानक उद्भवणाऱ्या आपत्कालीन परिस्थितीत किंवा नैसर्गिक आपत्तीत नागरिकांची सुरक्षा आणि बचाव करण्यासाठी या ट्रेनिंग कॅम्पचे केंद्र शासनाकडून आयोजन करण्यात आले असल्याची माहिती कॅम्प कमांडर कर्नल आशिष रैना यांनी दिली.देशासाठी कर्तव्य आणि जागरूकता निर्माण करण्याचे काम एनसीसीच्या माध्यमातून होत असून एनसीसीच्या विद्यार्थ्यांमध्ये कोणत्याही परिस्थितीला धैर्याने सामोरे जावून त्या परिस्थितीवर मात कशी करायची हा आत्मविश्वास या ट्रेनिंग कॅम्पच्या माध्यमातून दिला जाणार आहे. प्रशिक्षण पूर्ण केल्यानंतर प्रशिक्षणार्थी विद्यार्थ्यांना प्रमाणपत्र देण्यात येणार असून ज्या ज्यावेळी आपत्कालीन परिस्थिती निर्माण होईल त्या त्यावेळी या विद्यार्थ्यांची मदत घेतली जाणार आहे. घरापासून दूर आणि मोबाईलच्या विश्वापासून दूर राहून सर्वसामान्य नागरीकांशी समरस कसे व्हायचे याचे धडे या ट्रेनिंग कॅम्पच्या माध्यमातून प्रशिक्षणार्थी विद्यार्थ्यांना दिले जात आहे. त्यामुळे गौतम पब्लिक स्कूलच्या मैदानांना एकप्रकारे सैन्याच्या छावणीचे स्वरूप प्राप्त झाले आहे. या ट्रेनिंग कॅम्पला संस्थेचे विश्वस्त आमदार आशुतोष काळे व सचिव सौ.चैतालीताई काळे या भेट देणार आहेत. प्राचार्य नूर शेख यांच्या मार्गदर्शनाखाली गौतमचे एनसीसी सिटीओ ईसाक सय्यद सीएटीसी २०७/५७  महाराष्ट्र बटालियन एनसीसी वार्षिक ट्रेनिंग कॅम्प यशस्वीपणे पार पाडण्यासाठी परिश्रम घेत आहेत