शिर्डी नगरपंचायत झाली “नगरपरिषद” शिर्डीकरांसाठी सुवर्णक्षण शिर्डीतील सर्वपक्षीयांनी ना. आशुतोष काळेंचा केला सत्कार
शिर्डी नगरपंचायतीला राज्यसरकारकडून नगरपरिषदेचा दर्जा देण्यात आल्याबद्दल ना. आशुतोष काळे यांचा सर्वपक्षीय नेत्यांच्या वतीने सत्कार करण्यात आला.
संपादक :-रवींद्र जगताप
कोपरगाव :- मागील अनेक वर्षापासून शिर्डीची लोकसंख्या वाढत जाऊन ती ३१ हजार पार गेली आहे. त्यामुळे या शिर्डी नगरपंचायतीचे नगरपरिषदेमध्ये रुपांतर व्हावे अशी स्थानिक ग्रामस्थांची अनेक वर्षापासूनची मागणी होती. त्याबाबत श्री साईबाबा संस्थान विश्वस्त मंडळाचे अध्यक्ष ना.आशुतोष काळे यांनी केलेल्या प्रामाणिक प्रयत्नातून शिर्डी नगरपंचायतीला राज्यसरकारकडून नगरपरिषदेचा दर्जा देण्यात आला आहे. हा शिर्डीकरांसाठी सुवर्णक्षण असून शिर्डीच्या सर्वपक्षीय नेत्यांनी ना. आशुतोष काळे यांचा सत्कार केला आहे.राज्यासह देश-विदेशात प्रसिद्ध असलेल्या व कोट्यावधी साईभक्तांचे श्रद्धास्थान असलेल्या साईबाबांच्या शिर्डीला जगभरातून वर्षभर साईभक्त येत असतात. दिवसेंदिवस शिर्डीची लोकसंख्या वाढत असल्यामुळे शिर्डी नगरपंचायतीचे नगरपरिषदेत रुपांतर व्हावे अशी तमाम शिर्डीकरांची इच्छा होती. जेणेकरून शिर्डी नगरपरिषदेला विकासासाठी जास्तीत जास्त निधी मिळावा. या निधीतून होणारी विकासकामे साईभक्तांना सोयीसुविधा देण्यात परिपूर्ण राहतील. यासाठी शिर्डीकरांची शिर्डी नगरपंचायत नगरपरिषद होण्याची प्रतीक्षा आता संपली आहे. श्री साईबाबा संस्थानच्या विश्वस्त मंडळाच्या अध्यक्षपदी कोपरगाव विधानसभा मतदार संघाचे ना. आशुतोष काळे यांची निवड झाल्यानंतर ज्यावेळी त्यांनी अध्यक्षपदाचा कार्यभार स्वीकारला त्यावेळी शिर्डी ग्रामस्थांनी शिर्डी नगरपंचायत नगरपरिषद होण्यासाठी आपले राजकीय वजन वापरावे असे साकडे ना. आशुतोष काळे यांना घातले होते. शिर्डी ग्रामस्थांच्या रास्त असलेल्या मागणीचा विचार करून ना. आशुतोष काळे यांनी शिर्डीतील ग्रामस्थ व शिष्टमंडळासह राज्याचे उपमुख्यमंत्री अजितदादा पवार, नगरविकासमंत्री एकनाथ शिंदे यांच्याबरोबर अनेक वेळा बैठका घेऊन शिर्डी नगरपंचायतला नगरपरिषदेचा दर्जा द्यावा अशी मागणी केली होती. त्या मागणीची दखल घेऊन नगरविकास खात्याने शिर्डी नगरपंचायतीला नगरपरिषदेचा दर्जा देणेबाबत तातडीने अधिसूचना प्रसिद्ध केली होती. त्याबाबत ग्रामस्थांनी कोणताही आक्षेप घेवू नये असे आवाहन ना. आशुतोष काळे यांनी केले होते. त्या आवाहनाला शिर्डी ग्रामस्थांनी प्रतिसाद देत कोणताही आक्षेप न घेतल्यामुळे सर्व शिर्डी ग्रामस्थांच्या सहकार्याने शिर्डी नगरपंचायत नगरपरिषद होण्याचा मार्ग मोकळा होऊन शिर्डी नगरपरिषद झाली. हा शिर्डीकरांसाठी सुवर्णक्षण असल्यामुळे शिर्डी नगरपरिषद होण्यासाठी प्रामाणिक प्रयत्न करणाऱ्या ना. आशुतोष काळे यांचा सर्वपक्षीय नेत्यांनी जाहीर सत्कार करून त्यांचे आभार मानले आहे. यावेळी गौतम बँकेचे चेअरमन बाबासाहेब कोते, कैलासबापू कोते, ज्ञानेश्वर गोंदकर, सुधाकर शिंदे, रमेश गोंदकर, राकेश कोते, निलेश कोते, गोविंद कोते, शिर्डीचे नगराध्यक्ष शिवाजीराव गोंदकर, दत्तात्रय कोते, निलेश शिंदे, अविनाश शेळके, सचिन कोते, आप्पासाहेब कोते, अशोक कोते, महेंद्र शेळके, भागवत कोते, दादासाहेब गोंदकर, प्रमोद गोंदकर, पारेश्वर कोते, मुख्य कार्यकारी अधिकारी काकासाहेब डोईफोडे आदी मान्यवरांसह ग्रामस्थ उपस्थित होते.शिर्डी ग्रामस्थांच्या अनेक वर्षापासूनच्या शिर्डी नगरपंचायतीला नगरपरिषद करण्याच्या मागणीला साईबाबा संस्थानचे अध्यक्ष ना.आशुतोष काळे यांच्या प्रयत्नातून निश्चितपणे चालना मिळून शिर्डीकरांचे स्वप्नं साकार झाले आहे. त्याबद्दल ना.आशुतोष काळे यांनी राज्याचे उपमुख्यमंत्री अजितदादा पवार, नगरविकासमंत्री एकनाथ शिंदे यांचे आभार मानले आहे.
