ब्रेकिंग

विद्यार्थ्यांची भूक भागविणाऱ्या हातांना न्याय मिळालाच पाहिजे!

 

विद्यार्थ्यांची भूक भागविणाऱ्या हातांना न्याय मिळालाच पाहिजे!

शालेय पोषण आहार कर्मचाऱ्यांच्या हक्कांसाठी मंत्रालयापासून दिल्लीपर्यंत संघर्षाचा एल्गार!

किमान वेतनासाठी आमदार विवेकभैय्या कोल्हे मंत्रालयात पाठपुरावा करणार – रेणुकाभाभी कोल्हे

संघटनेसोबत निष्ठेने राहणाऱ्या प्रत्येक सभासदाच्या पाठीशी संघटना खंबीरपणे उभी राहील – सौ. सविता महेंद्र विधाते

बारा महिने मानधनासाठी दिल्लीमध्ये आंदोलन उभारण्याची तयारी ठेवा – महेंद्र विधाते

कोपरगाव, दि. २६ ऑक्टोबर २०२६ (प्रतिनिधी) : शाळेतील विद्यार्थ्यांना दररोज पोषण आहार देऊन त्यांच्या आरोग्याची काळजी घेणाऱ्या शालेय पोषण आहार कर्मचाऱ्यांना आजही अत्यल्प मानधनावर काम करावे लागत आहे. या कष्टकरी महिलांना किमान वेतन कायद्यानुसार वेतन, वर्षातील बारा महिने मानधन आणि सन्मानाने जगण्याचा अधिकार मिळवून देण्यासाठी शासनदरबारी तीव्र लढा उभारण्याचा निर्धार सम्यक फाऊंडेशन प्रणित श्रमिक मजदुर संघाच्या अहिल्यानगर जिल्हास्तरीय अधिवेशनात व्यक्त करण्यात आला.

सम्यक फाऊंडेशन प्रणित श्रमिक मजदुर संघ शालेय पोषण आहार कर्मचारी संघटना, अहिल्यानगर जिल्हा यांच्या वतीने रविवार, दि. २५ ऑक्टोबर २०२६ रोजी कोपरगाव येथील व्यापारी धर्मशाळेत जिल्हास्तरीय अधिवेशन मोठ्या उत्साहात पार पडले.या अधिवेशनाच्या अध्यक्षस्थानी सौ. सविता महेंद्र विधाते होत्या. संजीवनी महिला बचत गटाच्या अध्यक्षा माननीय सौ. रेणुकाभाभी विवेकभैय्या कोल्हे यांच्या प्रमुख उपस्थितीत अधिवेशन संपन्न झाले.

यावेळी संघटनेचे संस्थापक अध्यक्ष महेंद्र विधाते, राज्य समन्वयक सुभाष सोनवणे, उत्तम गायकवाड, कैलास पवार, शीतल दळवी यांच्यासह जिल्ह्यातील सर्व तालुका पदाधिकारी, जिल्हा पदाधिकारी आणि शालेय पोषण आहार महिला कर्मचारी मोठ्या संख्येने उपस्थित होते.

संघटनेसोबत निष्ठेने राहा, संघटना तुमच्या पाठीशी खंबीरपणे उभी राहील – सौ. सविता महेंद्र विधाते

अधिवेशनाच्या अध्यक्षस्थानावरून मार्गदर्शन करताना सौ. सविता महेंद्र विधाते यांनी संघटनेची एकजूट, सभासदांची निष्ठा आणि संघटनात्मक शिस्त यांचे महत्त्व अधोरेखित केले.त्या म्हणाल्या की, शालेय पोषण आहार कर्मचाऱ्यांच्या न्याय्य हक्कांसाठी संघटना सातत्याने संघर्ष करीत आहे. मात्र कोणतीही संघटना केवळ पदाधिकाऱ्यांच्या बळावर मोठी होत नसते, तर तिची खरी ताकद ही निष्ठावान सभासदांमध्ये असते. प्रत्येक सभासदाने संघटनेवर विश्वास ठेवून संघटनेसोबत प्रामाणिकपणे आणि निष्ठेने राहिले पाहिजे.”सर्व सभासदांनी निष्ठेने संघटनेसोबत राहावे. जो संघटनेसोबत असेल, त्याच्याच सोबत संघटना राहील. संघटनेची ताकद ही सभासदांच्या एकजुटीत आहे. त्यामुळे प्रत्येकाने संघटनेशी प्रामाणिक राहून आपल्या न्याय्य हक्कांसाठी एकत्रितपणे लढले पाहिजे,” असे स्पष्ट आवाहन सौ. सविता महेंद्र विधाते यांनी केले.सभासदांनी आपापसातील मतभेद बाजूला ठेवून संघटना मजबूत करण्यासाठी प्रयत्न करावेत. संघटना मजबूत असेल तरच शासनदरबारी कर्मचाऱ्यांच्या मागण्या प्रभावीपणे मांडता येतील, असेही त्यांनी सांगितले.

शालेय पोषण आहार कर्मचाऱ्यांच्या न्यायासाठी कोल्हे परिवार खंबीरपणे पाठीशी – रेणुकाभाभी कोल्हे

अधिवेशनाच्या प्रमुख अतिथी सौ. रेणुकाभाभी विवेकभैय्या कोल्हे यांनी शालेय पोषण आहार कर्मचाऱ्यांच्या प्रश्नांबाबत संवेदनशील भूमिका मांडली.शाळेतील विद्यार्थ्यांच्या पोषणाची जबाबदारी सांभाळणाऱ्या महिलांना अत्यल्प मानधनावर काम करावे लागत आहे. या कर्मचाऱ्यांना त्यांच्या श्रमाचा योग्य मोबदला मिळाला पाहिजे. त्यांना सन्मानाचे जीवन जगता यावे, यासाठी किमान वेतन कायद्यानुसार वेतन मिळवून देण्याच्या प्रश्नावर आमदार विवेकभैय्या कोल्हे हे मंत्रालय स्तरावर पाठपुरावा करतील आणि कर्मचाऱ्यांना न्याय मिळवून देण्यासाठी प्रयत्न करतील, असे आश्वासन त्यांनी दिले.शालेय पोषण आहार कर्मचाऱ्यांना शाळांमध्ये काम करताना येणाऱ्या विविध समस्या मांडण्यासाठी शासनाच्या माध्यमातून जिल्हास्तरावर आणि तालुकास्तरावर स्वतंत्र कार्यालय सुरू करण्याचा प्रयत्न आमदार विवेकभैय्या कोल्हे यांचा असल्याचे त्यांनी सांगितले.शालेय पोषण आहार कर्मचाऱ्यांच्या न्याय्य हक्कांच्या लढ्यात कोल्हे परिवार सदैव खंबीरपणे त्यांच्या पाठीशी उभा राहील, असा विश्वास त्यांनी उपस्थित कर्मचाऱ्यांना दिला.

किमान वेतन मिळेपर्यंत संघर्ष थांबणार नाही – महेंद्र विधाते

संघटनेचे संस्थापक अध्यक्ष महेंद्र विधाते यांनी आपल्या भाषणातून शालेय पोषण आहार कर्मचाऱ्यांच्या प्रश्नांकडे शासनाचे लक्ष वेधले.

शालेय पोषण आहार कर्मचारी अनेक वर्षांपासून अत्यल्प मानधनावर काम करीत आहेत. वाढत्या महागाईच्या काळात या मानधनावर कुटुंबाचा उदरनिर्वाह करणे अत्यंत कठीण झाले आहे. विद्यार्थ्यांची भूक भागविणाऱ्या महिलांना स्वतःच्या कुटुंबाच्या उदरनिर्वाहासाठी संघर्ष करावा लागत आहे, ही गंभीर बाब असल्याचे त्यांनी सांगितले.कर्मचाऱ्यांना किमान वेतन कायद्यानुसार वेतन मिळावे, वर्षातील बारा महिने मानधन मिळावे आणि त्यांच्या श्रमाला योग्य सन्मान मिळावा, यासाठी शासनदरबारी सातत्याने पाठपुरावा करण्यात येणार असल्याचे त्यांनी स्पष्ट केले.”हा लढा केवळ मानधनवाढीचा नसून कष्टकरी महिलांच्या स्वाभिमानाचा, अस्तित्वाचा आणि सन्मानाने जगण्याच्या अधिकाराचा आहे. शालेय पोषण आहार कर्मचाऱ्यांना न्याय मिळवून दिल्याशिवाय संघटना स्वस्थ बसणार नाही,” अशी भूमिका त्यांनी मांडली.बारा महिने मानधन मिळविण्यासाठी आवश्यकता भासल्यास दिल्लीमध्ये व्यापक आंदोलन उभारावे लागेल. त्यासाठी सर्व कर्मचाऱ्यांनी संघटित राहून आंदोलनाची तयारी ठेवावी, असे आवाहन महेंद्र विधाते यांनी केले.

महिला कर्मचाऱ्यांनी मांडल्या आपल्या व्यथा

या अधिवेशनात जिल्ह्याच्या विविध तालुक्यांतून आलेल्या अनेक महिला कर्मचाऱ्यांनी आपल्या समस्या मांडल्या.अत्यल्प मानधन, वाढती महागाई, कुटुंबाचा उदरनिर्वाह आणि शाळांमध्ये काम करताना येणाऱ्या विविध अडचणी याबाबत महिलांनी आपल्या भावना व्यक्त केल्या.विद्यार्थ्यांच्या आरोग्यासाठी महत्त्वपूर्ण योगदान देणाऱ्या या कर्मचाऱ्यांच्या प्रश्नांकडे शासनाने गांभीर्याने लक्ष द्यावे आणि त्यांच्या मागण्यांवर तातडीने सकारात्मक निर्णय घ्यावा, अशी मागणी यावेळी करण्यात आली.

उत्तर व दक्षिण अहिल्यानगर जिल्हा कार्यकारिणीची निवड

संघटनेची संघटनात्मक बांधणी अधिक मजबूत करण्याच्या उद्देशाने अधिवेशनात उत्तर अहिल्यानगर व दक्षिण अहिल्यानगर अशा दोन स्वतंत्र जिल्हा कार्यकारिणींची निवड करण्यात आली.तसेच संघटनेच्या नवीन राज्य समन्वयकांचीही निवड करण्यात आली. सर्व नवनियुक्त पदाधिकाऱ्यांचा संघटनेचे संस्थापक अध्यक्ष महेंद्र विधाते यांच्या हस्ते सत्कार करण्यात आला.नवनियुक्त पदाधिकाऱ्यांनी संघटनेचे कार्य अधिक प्रभावीपणे पुढे नेऊन कर्मचाऱ्यांच्या न्याय्य हक्कांसाठी संघर्ष करण्याचा निर्धार व्यक्त केला.

कोपरगाव तालुक्याच्या पदाधिकाऱ्यांचे उत्कृष्ट नियोजन

या जिल्हास्तरीय अधिवेशनाचे आयोजन कोपरगाव तालुक्याच्या वतीने करण्यात आले होते. कार्यक्रमासाठी उपस्थित कर्मचाऱ्यांची बैठक व्यवस्था, खुर्च्या, गाद्या, नाष्ट्याची पाकिटे तसेच इतर आवश्यक सुविधांचे नियोजन कोपरगाव तालुक्यातील पदाधिकारी व सभासदांनी केले होते.कार्यक्रम यशस्वी करण्यासाठी प्रकाश पानपाटील, किरण कदम, वाल्मिक पाठक, गुलाब शेख, सुरेश गायके, रियाज तांबोळी, आप्पा साळुंखे, बाबासाहेब खरे, मोनिका ठाणगे, सारिका गडाख, बाळू माळी यांच्यासह सर्व तालुका पदाधिकारी व सभासदांनी विशेष परिश्रम घेतले.अधिवेशनाचे प्रास्ताविक राज्य समन्वयक उत्तम गायकवाड यांनी केले. कार्यक्रमाचे सूत्रसंचालन विद्या अभंग यांनी केले, तर आभार प्रदर्शन बाबासाहेब गोरडे यांनी केले.शालेय पोषण आहार कर्मचाऱ्यांना किमान वेतन, बारा महिने मानधन आणि सन्मानाचे जीवन मिळवून देण्यासाठी संघटित संघर्ष अधिक तीव्र करण्याचा निर्धार व्यक्त करीत अधिवेशनाची सांगता झाली.

 

अधिवेशनातील प्रमुख मागण्या

१. शालेय पोषण आहार कर्मचाऱ्यांना किमान वेतन कायद्यानुसार वेतन देण्यात यावे.

२. कर्मचाऱ्यांना वर्षातील संपूर्ण बारा महिने मानधन मिळावे.

३. शालेय पोषण आहार कर्मचाऱ्यांना आर्थिक व सामाजिक सुरक्षितता मिळावी.

४. कर्मचाऱ्यांच्या समस्या सोडविण्यासाठी जिल्हास्तरावर व तालुकास्तरावर स्वतंत्र शासकीय कार्यालय सुरू करावे.

५. कर्मचाऱ्यांना सन्मानाने जीवन जगता येईल, असे शासनाने धोरण राबवावे.

संपादक रवींद्र जगताप

सत्य एक्सप्रेस न्युजच्या व्हाँटसाँप ग्रुपवर सहभागी होण्यासाठी खालिल लिंक दाबा

https://chat.whatsapp.com/JcX8YoNk9gs6W6YGtE20ZI?s=cl&p=a&ilr=0&amv=2

बातम्यासाठी 9175751349 हा नंबर आपल्या व्हाटसाँप ग्रुपला अँड करा

 

बातमी शेअर करणायसाठी येथे क्लिक करा

Related Articles

Leave a Reply

Your email address will not be published. Required fields are marked *

Back to top button
बातमी कॉपी करणे हा कायद्याने गुन्हा आहे