अंजनापूर बंधारा फुटल्याने झालेल्या नुकसानीचे पंचनामे करा ना. आशुतोष काळेंच्या सूचना

अंजनापूर बंधारा फुटल्याने झालेल्या नुकसानीचे पंचनामे करा ना. आशुतोष काळेंच्या सूचना

बंधारा दुरुस्तीसाठी कर्मवीर काळे कारखान्याची यंत्रणा पाठविली

संपादक :- रविंद्र जगताप

कोपरगाव प्रतिनिधी :- कोपरगाव तालुक्यातील अंजनापूर येथील बंधारा गुरुवार (दि.०८) रोजी सकाळी झालेल्या मुसळधार पावसामुळे फुटला असून त्यामूळे शेतातील उभ्या पिकांचे मोठे नुकसान झाले आहे. या नुकसानीचे तातडीने पंचनामे करून अहवाल तयार करा अशा सूचना श्री साईबाबा संस्थानच्या विश्वस्त मंडळाचे अध्यक्ष ना. आशुतोष काळे यांनी तहसीलदार विजय बोरुडे व गटविकास अधिकारी सचिन सूर्यवंशी यांना दिल्या आहेत.मागील आठवड्यात मोठ्या प्रमाणात अतिवृष्टी झाल्यामुळे अंजनापूर येथील बंधाऱ्याला काही प्रमाणात धोका निर्माण होवून बंधारा फुटण्याची शक्यता निर्माण झाली होती. त्यामुळे अंजनापूर ग्रामपंचायत व ग्रामस्थांनी तात्पुरती डागडुजी केली होती. मात्र गुरुवार (दि.०८) रोजी सकाळी पुन्हा एकदा मोठ्या प्रमाणावर अतिवृष्टी झाल्यामुळे बंधाऱ्यात मोठ्या प्रमाणात पाण्याची आवक होवून क्षमतेपेक्षा जास्त पाणी आल्यामुळे हा बंधारा अखेर फुटला. त्यामुळे बंधाऱ्याच्या लगत असणाऱ्या शेतीचे मोठे नुकसान झाले आहे. शेतातील उभ्या असलेल्या सोयाबीन, मका, बाजरी आदी पिकांचे मोठे नुकसान झाले आहे.सदर बंधारा फुटल्यामुळे झालेल्या नुकसानीची दखल घेवून ना. आशुतोष काळे यांनी तातडीने तहसीलदार विजय बोरुडे व गटविकास अधिकारी सचिन सूर्यवंशी यांच्याशी संपर्क करून शेतकऱ्यांच्या झालेल्या नुकसानीचे तातडीने पंचनामे करून लवकरात लवकर अहवाल तयार करून शासन दरबारी सादर करण्याच्या सूचना केल्या आहेत. तसेच बंधाऱ्याच्या दुरुस्तीसाठी कर्मवीर शंकरराव काळे सहकारी साखर कारखाना प्रशासनाला सदरचा बंधारा दुरुस्तीसाठी यंत्रणा पाठविण्याच्या सूचना दिल्या असून बंधारा दुरुस्तीसाठी कर्मवीर शंकरराव काळे कारखान्याच्या वतीने बंधारा दुरुस्तीचे काम सुरु करण्यात आले आहे. यावेळी कर्मवीर शंकरराव काळे सहकारी साखर कारखान्याचे संचालक प्रवीण शिंदे, ज्ञानेश्वर गव्हाणे,नानासाहेब गव्हाणे, विजय कोटकर,नाना गव्हाणे,दत्तू गव्हाणे,शिवाजी गव्हाणे,रावसाहेब गव्हाणे,भास्कर गव्हाणे,प्रकाश गव्हाणे, दत्तू गव्हाणे, विजय गव्हाणे ,विवेक गव्हाणे ,आप्पासाहेब पाडेकर, अनिल पाडेकर,आर.आर.रोहमारे, पंचायत समिती अभियंता जी.डी.लाटे, पाटबंधारे विभागाचे ए.पी.वाघ, आर. आर.रोहम, शाखा अभियंता एन.जी.गायकवाड उपस्थित होते